الحصة التاسعة

من الذاكرة

الحصة التاسعة

هذى الحصه اساسا ماهي لي .. لمدرس ثاني واظاهر بدت حركات الميانه
والنص كم وكل واحد يقولك تعبان ومشغول وتكفى خذ حصتي ..
وبما اني اليوم مروق ما عندي مشكله اخذت الحصه هذى عن مدرس
وكانت عند نفس الفصل خامس/ب .. سالت المدرس وش اعطيهم ؟
وش عليهم ماده فقالي ما ادري بالضبط بس شف وش ودك تعطيهم وعطهم
انا رحت الفصل وسالتهم وش عليكم طلع عليهم قراءة .. طالعت لقيتهم
ماشين في المنهج مزبوط .. فما عطيتهم شي بس جلست اسولف معاهم
واعطيهم بعض النقاط الى على قد فكرهم فيها توجيه خفي لعقولهم
كان فيه عمده الفصل الى اقولكم عليه في الموضوع السابق يلعب
اول حصه جيتهم واخذته وعطاني وعد انه يجلس عاقل ..
وفي هذى المره لعب .. فطالعت فيه بنظر وقلت له خلك معي
واسمع وش بقول .. انتبه معي الولد فقلت للطلاب بسالكم سؤال
الرجال الى يعطي وعد ويخلف وعده وش يطلع ؟؟؟
قالو الطلاب يطلع حررررررررررررمه يا استاذ
طبعا الصغار موتهم ولا تقول عنه انه مو رجال .. الطالب فورا قلب لون وجهه
وعطيته نظره ثانيه مع ابتسامه وقلت له هاه ؟؟؟
قال لا يا استاذ والله وعد رجال بس يا استاذ متي ينتهي الوعد ؟
قلت اذا خذت الدرجه كامله ان شاء الله .. قال يعني بتعطيني درجات؟
قلت لو استمريت على وعدنا صدقني تاخذها كامله ولو فيه زياده اعطيك بعد
فرح بشكل ماتخيلونه مع ان المدرسين يذمونه وينتقدونه .. لكن باين
ان نص عيوب طلابنا من المدرسين مو منهم مساكين ..

الله يرحم الحال بسشلكم تحياتي .. مع حصه جديده باذن الله
بكذا اكون خلصت كل الحصص الى درستها حتى الان في موضوعات
علشان اقدر امشي معاكم اول باول وما اتاخر في طرح شي منها او اتركه وانسى بعضها مع الوقت

شخصي

رابط الصفحة : www.From-Memory.com/articles.php?id=67