الحصة الثامنه

من الذاكرة

الحصة الثامنه

الحصه الثامنه عند خامس/ ب .. فصل عدد الطلاب فيه متوسط
يعني مو قليل ولا كثير .. كان عندي مشكله في هذى الحصه
لانها حصه تاريخ .. انا وين والتاريخ وين يعني ومثل ما قلت
في الموضوعات السابقه انه ودي اكون محضر وحاضر
ذهنيا مع الطلاب وما يكون الدرس عباره عن تلقين فقط
في البدايه سالتهم كيف ودهم اعطيهم الدرس ؟؟!! فجاوبوني
انهم يبغونه مثل ما يعطيهم استاذهم الاساسي .. بطريقه القصه
انا مؤمن طبعا بان طريقه القصه ممتازه خاصه في مواد مثل
التاريخ .. لكن الاشكاليه انك لازم تبتعد عن هذى الطريقه اذا
ماكنت محضر لها مسبقاً .. وهذا الى صار معي اليوم ..
قلت لهم اليوم بنستخدم طريقه ثانيه والاسبوع الجاي قصه
طبعا هروب مني لحد ما استلم كتب المواد واعرف اضبط
الوضع واموري بالشكل الى احس انه يلبي الغرض ويرضيني
ويعود طبعا على الطلاب بالفايده .. المهم .. استخدمت معاهم
طريقه القراءة خليت الطلاب يقرئون الدرس .. واتابع معاهم
ونشبت لهم الى احسه مو معاي في الدرس اقوله كمل ويتورط
لحد ما اجبرو على انهم يتبعون علشان ما يفاجأ احد فيهم باني
اقوله كمل وين وصل زميلك .. هذا الكلام في اول عشر دقايق ..
بعدها بديت اشرح لهم باسلوب القصه وكان هدفي من انهم يقرون الدرس
اني في هذى الفتره اكون قدرت اطلع على الدرس معاهم واصف افكاري
تقدرون تقولون دبلوماسيه من الهروب .. بعدها قمت وكتبت عناصر على
السبوره .. الموضوع طبعا عن الدولة الامويه وعن الخليفه معاويه بن ابي سفيان ..
كتبت العناصر تقريباً خمس عناصر .. وبدات اشرح لهم على ضوئها
وبعد ما انتهيت من الشرح سالتهم فاهمين ؟ قالو ايه يا استاذ
قلت اكيد كلكم فاهمين ؟؟؟
قالو اييه يا استاذ

وقفت اكبر واحد فيهم وهو تقريبا عمده الفصل ..
وقلت له قم اطلع على السبوره وانت الاستاذ الحين
ابيك تشرح لزملائك العنصر الاول وتقدر تستعين بالكتاب
او تقراء منه .. واذا خلصت اسئلهم اساله والى يجاوبك
عطه درجه .. استغربو في البدايه وهذا انحرج كثير
ساعدته .. في البدايه لين كمل لوحده وتشجع ..
وطرح اسئله والطلاب ينادوني استاذ استاذ بجاوب
وانا اقولهم الاستاذ هو زميلكم الحين هو الى يختار
وهو الى بيعطي درجات للي يجاوب صح ..

انبسطو كثير بالطريقه هذى .. قمت بعده كم واحد
يشرحون كل عنصر .. والطلاب طبعا متفاعلين كلهم
والسؤال يتكرر في كل عنصر على اكثر من طالب
لين ما تاكدت ان الجميع صار ملم بكل العناصر

لما انتهيت من الدرس .. قلت للطلاب الى عنده شي بيسويه
يسوي بدون ازعاج .. انا خلصت الدرس خلاص ..
وجلسوا يسولفون معي لحد ما انتهى الدرس

وفي النهايه طلبو مني ما استخدم اسلوب القصه
وان اسلوب الشرح افضل وعاجبهم ..

الاسبوع الجايه باذن الله ناوي لهم طريقه المجموعات
اتمنى من الله اني اوفق فيها .. واذا نفذتها عطيتكم التفاصيل
لكم تحياتي .. الى الحصه التاسعه

شخصي

رابط الصفحة : www.From-Memory.com/articles.php?id=66