مدونة من الذاكرة © From-Memory

مدونة من الذاكرة © From-Memory
     عُـلبة ألــوان البطاقات  الرئيسية


  :: الصفحة الأولى ::
  
  عُـلبة ألــوان
  
  شمعـه مضيئــه
  
  كشكـول أيامي
  
  أحاديث نفـسـ
  
  لوحات ناطقة
  
  صـورة مقـلوبـة
  
  يوميات مدرس
  
  تـقـنـي
  
  البطاقات

 

::: بحث :::



::: حكمة :::

إذا تكلمت بالكلمة ملكتك وإذا لم تتكلم بها ملكتها


::: مواقع  :::

 

من الذكرة


::: راسلنا :::

الاسم :

البريد الإلكتروني :

موضوع الرسالة :

نص الرسالة :


::: إحصائية المدونة :::

 

  عدد الزيارات الكلية : 369586
   عدد المقالات المنشورة : 229
   عدد الأقسام المفتوحة :8


 
 

من الذاكرة

4/10/1430

دعوة لقراءة المقال

نسخة لطباعة المقال


مراحل تطور السياكل وعبدالله ولد لطيفة



تعرفون مرحلة الطفولة مليانه بالشقاوة ومليانه بالمواقف ويمكن يفرق بين الشخص والاخر عدد المواقف والمشاكل الى كان يسببها فيه اطفال هاديين وفيه اطفال شياطين وفي اطفال لا توطى لهم على طرف ,, وتعرفون من اكثر الامنيات ذيك الايام كان ان الواحد يمتلك له سيكل جوبتير قمة المتعه تحس انك وش شارين لك بانوراما وتعلق في الرفرف الخلفي ريشه تنظيف واقفه وتركب له محاقين قققااااا يطلع شي شي ,, وكانك عاد فنان تلعبن بالشطرطون على الجنط حق الكفرات بشكل يطلع خرافي وانت تمشي نجوم وحركات تموج والوان ,, بمفهوم آخر زي الى يركبون جنوط الحين على سياراتهم ترانا سابقينهم في الفن والزبرقه لايهمونكم هههههههه

وبوريكم سياكلنا حسب التطور الجيني لها مع مر السنوات وكل عمر وش كان يناسبه ,, في المرحله الاولى من الحياة يجيبون لك عربية يرمونك فيها لين تتعلم تمشي يعني في هلمرحله يعتبرونك نزغه والهدف من العربية عندهم انهم يحجرون لك يعني اذا حطوك فيها لازم تعرف وتيقن انك بثر وانهم مالين منك ويبون الفكة يرمونك وانت تلقاك سبهه تفرفر برجولك فيها في البيت يقالك جالس تلعب ..

وهذى الصورة الأولى في أولى المراحل العمرية يومك مالك حول ولا قوة هم يختارون لك النوع واللون وكلش انت تركب فيها وتعضلك على شحمه.

هذى المرحله قبل ماتمشي يعلقونك يقالك يخلونك تلعب وياكلونك اكل الله يديم النعمة مهروس ومسلوق وشي خلها على الله حيله العاجز وش تقول عاد..

ثم من تبدا تحرك رجيلاتك شوي يجيبون لك الثانيه ام كفرات في البيت واذا بغو يطلعون لانك ثقيل دم ولا لهم خلق يشيلونك يجيبون لك مشايه وعربيه ..

ومن ثم تبدا مرحله الاستمتاع بالحياة ويصير لك حرية الاختيار في سيكل ابو ثلاث كفرات سواق ورديف في الخلف تعرفون علشان اذا جاء احد من اخوياك تردفه معه وتكشخ به ان معك سيكل والصدق عاد انهم يوفرون ومايشترونه لك الا وهم جايبين لك اخو صغير ويبلشونك ياتردفه معك ولا مافيه لعب فيه يعني ياحياتي انت يالضعيف تجلس تدرج تدف وزنك ووزن غيرك يتمشى على حساب رجولك ,, تلقى كل عيالنا رجولهم فيها عضلات من الظلم الى يقع عليهم,,, صورة لكم افتراضيه طبعا مهوب انا والله هههههههه

بعدين تجي مرحله التطور وتبدا تتعلم على السيكل ابو كفرين بمساعدات جانبيه لين توزن الامور تقوم تفكهم لان اخوياك يضحكون عليك بزر يسوق ابو اربع كفرات فتلقاك تشنقلها على فوق تعكسها علشان تمشي على كفرين واذا رجعت البيت ترجعها يعنني تراني محافظ عليه ... وهي مرحله ممتعه تبدا تتعلم فيها فنوان السيكل.

عاد تجي مرحله الانحراف والابداع مع سيكل ماركة جوبتير ( صتي) كان قمة العربجة والشعور بالرجوله انك تاخذ سيكل وكان دارج مقاسين مقاس 18 ومقاس 24 وعلشان تثبت انك خالع وعربجي تاخذ المقاس الاكبر ورجولك ماتطول الدواسات وعلشان تحل هلمشكله تلقاك جالس بنص السيكل لانك ماتقدر تجلس على المرتبه ماتطول الدواسات ...

ومع التطور التكنولوجي الى اصاب الحياة في ذاك الوقت ومع العلاقات السياسية الجيده مع الدول الغربية جت صرغه وموضه السياكل الامريكية وكنا خاقين عليها من يشتريه بس ياربيه كشخه من قده والاسفنجه في النص ياهوووه بس احس بشعور رهيب ههههه

ثمن جت صرعه السيكل الاخير في ذيك المرحله وهي في الصورة الاخيره صراحه ماخفيكم مالحقت عليها كنت تعديت هلمرحله ومعي سيارة بس كنت اشوفهم واتحسوف اقول ليت معي واحد ودي افحط فيه على الرمل في اللفه ههههههه

طبعا جاء بعد هلمراحل سياكل متطوره بشكل يخليك تحس انك كنت ضعيف ملعوبن عليك بس عاد وش نقول يله لكل زمن دوله ورجال هههه مالامه دخل التشبيه ...

وبطاري السياكل بقول لكم قصه عبدالله ولد لطيفه

لطيفة طال عمركم ضعيفه كانت تجي عند جدتي كل فتره تاخذ المقسوم وتروح وبعد فتره من الزمن تحسنت ظروفها وكانت تكن ولاء لجدتي الله يحفظها ودايما تمر تسلم عليها , وكنا في ذاك الوقت نتجمع في الصيفيه عند جدتي ننام عندها شهرين متتاليه نفلها فله لا ابو ولا ام يعني ادعس وازحف تنحف ياهوه ,, تعرفون قلب الجد احن وارق على احفاده ولا يخلي احد يهاوشهم ولا يقول لهم شي يعني نفلللللللها فله غير طبيعية, وفي ذيك الحزه معنا السياكل ومافيه الا لفلفه وكان فيه منغص الكرم الزايد كل ماجو ضيوف قالو لنا لعبوهم معكم في السياكل ,, وكان اول سؤال يدور في روسنا ياخي وراهم مايجيبون سياكلهم معهم ,, ودايم يقولون لنا عطوهم السيكل يلعبون  فيه ياخذون دوره طيب مايفكرون اني لو عطيت هلضيف السيكل بجلس لحالس وربعي بيجلسون يلعبون وانا بجلس ضايق صدري واذا صار خويي بعد يبغاني بيصير طفشان مايبي يجلس يلف مع واحد مايعرفه ,, المهم ياطويلين العمر والسلامه مالكم في الطويله ذيك المره جت لطيفه ومعها ولدها عبدالله هو تقريبا في عمرنا ولكن قلق صراحه جدتي ترحمه وتدلعه واول مادخل نادتنا ياعيال لعبوه معكم وعطيناه السيكل تعرفون مانقدر نقول لا الا ابو الشباب مهوب يستحي يلف يلف يله خلاص رجع السيكل ماش وجهن مغسول بمرق مارجعه لمحنا له ماش مافاد فيه خذنا السيكل منه راح يشتكي قال مايلعبوني ,, ايووووه بدينا وهنا هو جنا على نفسه جانا هواش من بعيد ياعياااااااااال ابزنه لعبو الولد معكم في السياكل ,,, طيب طيب ياجدتي خليه يجي وهو جاء ولا ماجاء عاد عطيناه السيكل ورحنا في اقصى البيت من الخلف نتحرى له يلف خليناه يشعر بالامان اللفه الاولى الثانيه الثالثه ونمسكة وننزله من السيكل ومعنا حبل ونربطه في الماصوره الى في راسها بزبوز ومافيه الا تربيط ثبتناه معها وفتحنا البزبز عليه وخذنا السيكل وانحشنا برا البيت ,, طبعا ماخفيكم اننا يوم رجعنا اكلنا علقه يحبها قلبك وانطردنا كل واحد لبيتهم جزاء لنا وردعا لامثالنا  ههههههه

وسلامتكم يالغالين ,,,
اخوكم من الذاكرة ...

مصدر الموضوع : شخصي



بنت نجد       2625


تدري عاد احنا مرينا بثلاث مراحل من المراحل اللي فوق بعدين فجاة صار ممنوع ليه طيب ممنوع وبس كانت السياكل شبه ضرب من المستحيل يسوقونها البنات والمشكلة مافيه تعويض مافيه سيكل طب عوضونا بشي غيره ! وكبرنا وكبرت امانينا فينا ههههههه صرنا نشوف السيارات برضه ضرب من المستحيل بس وش لي بالتعب خلهم يسوقون عني وارتاح وش لي برفعالضغط بهالشوارع اما سالفة عبدالله الظاهر لو صابرين عليكم شوي كان الاحداث من غير سلوكك في المراهقة وخلاك تعقل اجل ؟ ههههههههه اجرام اجرااام اذكر اول اللي يحط بسيكله سفنج وحركات يطلع كشخه وتروح عيوني من كثر ماالاحق السفنج وهو يدور طبعا لغير الناطقين بالعربية سفنج مواعين ملون واللي يسوقه وهو واقف لزوم الاستعراض واللي مايمسك الدركسون مدري وش يسمونه كانت ايام الله يوسع صدرك بالعافية


Re: رد على التعليق :

ههههههههههههههههه الله يرجك يابنت نجد والله انك مهبوله من جد لعن ابو بليسك كنتي تمشين مع عيال الحارة من اول من وين تطلعين ذا الكلام الله يرجك عدوك والله من جد ضحكتيني خبله خبله هههههه اجل اول تلاحقين الاسفنجات خاقتن معهم تقل معه بنتلي الحين هههه

شاكرن لك هلطله الحلوه
كوني بالجوار دائما

 


1       2792


:0

أضف تعليقك على الموضوع


الأسم
البريد


جميع الحقوق محفوظة© مــن الـــذاكرهـ  - خلاصة المقالات